Here is the Shivashtakam originally composed by Shri Shankaracarya.
शिवाष्टकम्
|| śivāṣṭakam ||
तस्मै नमः परमकारणकारणाय दीप्तोज्ज्वलज्ज्वलितपिङ्गललोचनाय ।
नागेन्द्रहारकृतकुण्डलभूषणाय ब्रह्मेन्द्रविष्णुवरदाय नमः शिवाय ॥१॥
tasmai namaḥ paramakāraṇakāraṇāya dīptojjvalajjvalitapiṅgalalocanāya |
nāgendrahārakṛtakuṇḍalabhūṣaṇāya brahmendraviṣṇuvaradāya namaḥ śivāya ||1||
श्रीमत्प्रसन्नशशिपन्नगभूषणाय शैलेन्द्रजावदनचुम्बितलोचनाय ।
कैलासमन्दरमहेन्द्रनिकेतनाय लोकत्रयार्तिहरणाय नमः शिवाय ॥२॥
śrīmatprasannaśaśipannagabhūṣaṇāya śailendrajāvadanacumbitalocanāya |
kailāsamandaramahendraniketanāya lokatrayārtiharaṇāya namaḥ śivāya ||2||
पद्मावदातमणिकुण्डलगोवृषाय कृष्णागरुप्रचुरचन्दनचर्चिताय ।
भस्मानुषक्तविकचोत्पलमल्लिकाय नीलाब्जकण्ठसदृशाय नमः शिवाय ॥३॥
padmāvadātamaṇikuṇḍalagovṛṣāya kṛṣṇāgarupracuracandanacarcitāya |
bhasmānuṣaktavikacotpalamallikāya nīlābjakaṇṭhasadṛśāya namaḥ śivāya ||3||
लम्बत्सपिङ्गलजटामुकुटोत्कटाय दंष्ट्राकरालविकटोत्कटभैरवाय ।
व्याघ्राजिनाम्बरधराय मनोहराय त्रैलोक्यनाथनमिताय नमः शिवाय ॥४॥
lambatsapiṅgalajaṭāmukuṭotkaṭāya daṁṣṭrākarālavikaṭotkaṭabhairavāya |
vyāghrājināmbaradharāya manoharāya trailokyanāthanamitāya namaḥ śivāya ||4||
दक्षप्रजापतिमहामखनाशनाय क्षिप्रं महात्रिपुरदानवघातनाय ।
ब्रह्मोर्जितोर्ध्वगकरोटिनिकृन्तनाय योगाय योगनमिताय नमः शिवाय ॥५॥
dakṣaprajāpatimahāmakhanāśanāya kṣipraṁ mahātripuradānavaghātanāya |
brahmorjitordhvagakaroṭinikṛntanāya yogāya yoganamitāya namaḥ śivāya ||5||
संसारसृष्टिघटनापरिवर्तनाय रक्षः पिशाचगणसिद्धसमाकुलाय ।
सिद्धोरगग्रहगणेन्द्रनिषेविताय शार्दूलचर्मवसनाय नमः शिवाय ॥६॥
saṁsārasṛṣṭighaṭanāparivartanāya rakṣaḥ piśācagaṇasiddhasamākulāya |
siddhoragagrahagaṇendraniṣevitāya śārdūlacarmavasanāya namaḥ śivāya ||6||
भस्माङ्गरागकृतरूपमनोहराय सौम्यावदातवनमाश्रितमाश्रिताय ।
गौरीकटाक्षनयनार्धनिरीक्षणाय गोक्षीरधारधवलाय नमः शिवाय ॥७॥
bhasmāṅgarāgakṛtarūpamanoharāya saumyāvadātavanamāśritamāśritāya |
gaurīkaṭākṣanayanārdhanirīkṣaṇāya gokṣīradhāradhavalāya namaḥ śivāya ||7||
आदित्यसोमवरुणानिलसेविताय यज्ञाग्निहोत्रवरधूमनिकेतनाय ।
ऋक्सामवेदमुनिभिः स्तुतिसंयुताय गोपाय गोपनमिताय नमः शिवाय ॥८॥
ādityasomavaruṇānilasevitāya yajñāgnihotravaradhūmaniketanāya |
ṛksāmavedamunibhiḥ stutisaṁyutāya gopāya gopanamitāya namaḥ śivāya ||8||
शिवाष्टकमिदं पुण्यं यः पठेच्छवसंनिधौ ।
शिवलोकमवाप्नोति शिवेन सह मोदते ॥
śivāṣṭakamidaṁ puṇyaṁ yaḥ paṭhecchavasaṁnidhau |
śivalokamavāpnoti śivena saha modate ||
॥ इति श्रीमच्छङ्कराचार्यविरचितं शिवाष्टकं सम्पूर्णम् ॥
|| iti śrīmacchaṅkarācāryaviracitaṁ śivāṣṭakaṁ sampūrṇam ||
Bookmarks